ရိုးရှင်းပေမဲ့ထိရောက်တဲ့ အသက်ရှူလေ့ကျင့်ခန်း (Breathing Exercise)
စိတ်ခံစားချက်ပြင်းထန်နေတဲ့အချိန်တိုင်းမှာ ပြန်လည်တည်ငြိမ်သွားစေမဲ့ အထိရောက်ဆုံးနည်းလမ်းတစ်ခုက “အသက်ရှူခြင်း” (breathing exercise) ပါပဲ။ ဘာကြောင့်လဲဆိုတော့ ဝင်လေထွက်လေဟာ စိတ်ခံစားချက်တွေ၊ စိတ်ခံစားချက်ကို ထိန်းချုပ်နေတဲ့ဟော်မုန်းတွေနဲ့ ဆက်နွယ်မှုရှိနေလို့ပါပဲ။
လူတွေက အချိန်စက္ကန့်တိုင်းမှာ အသက်ရှူသွင်း၊ ရှူထုတ်လုပ်ဖြစ်နေကြတာတော့ဟုတ်ပါတယ်။ ဒါပေမဲ့ တကူးတကသတိမပြုမိကြသလို အာရုံလည်း မစိုက်ဖြစ်ကြပါဘူး။ အသက်ရှူခြင်းက ဦးနှောက်ရဲ့ “အနားယူခြင်းနဲ့ အစာခြေခြင်းဆိုင်ရာ အာရုံကြောစနစ်” ကို လှုံ့ဆော်ပေးတာကြောင့် စိတ်ခံစားချက်များနဲ့ ဆက်နွယ်နေရခြင်းဖြစ်ပါတယ်။ ဒါကြောင့်လည်း အသက်ရှူသွင်းမှု၊ ရှုထုတ်မှု တစ်ချက်စီတိုင်းကို သတိပြုပြီး နက်နက်ရှိုင်းရှိုင်း အသက်ရှူလေ့ကျင့်ခန်းလုပ်ပေးခြင်းက ရိုးရှင်းသော်ငြား ထိရောက်တဲ့အကျိုးကျေးဇူးများစွာရှိနေပါတယ်။
နေ့စဉ်နေ့တိုင်း အသက်ရှူလေ့ကျင့်ခန်းပုံမှန်လုပ်ပေးခြင်းက
ပူပင်သောကများခြင်း
စိတ်ဓာတ်ကျဆင်းခြင်း
စိတ်ဖိစီးမှုများခြင်း
စိတ်ဆတ်ခြင်း
စိတ်မရှည်ခြင်း
ဒေါသကြီးခြင်း
ပူလောင်လွယ်ခြင်း အစရှိတဲ့ စိတ်ပိုင်းဆိုင်ရာ ဆိုးရွားတဲ့ခံစားချက်တွေကို လျော့နည်းသက်သာစေပါတယ်။
ဒါ့အပြင် အိပ်ပျော်စေခြင်း၊ အာရုံစူးစိုက်မှုကောင်းခြင်း၊ စိတ်တည်ငြိမ်စေခြင်း၊ စိတ်ခံစားချက်ကို ထိန်းချုပ်နိုင်ပြီး ဆုံးဖြတ်ချက်ခိုင်မာစေခြင်း အစရှိတဲ့ကောင်းကျိုးတွေကိုပေးနိုင်ပါတယ်။ ရိုးရှင်းပြီးထိရောက်တဲ့အသက်ရှူလေ့ကျင့်ခန်းတွေကို ဖော်ပြပေးရရင်..
(၁) Box Breathing
အသက်ရှုသွင်းပြီး စိတ်ထဲကနေ တစ်၊နှစ်၊သုံး၊လေး ရေရွတ်လိုက်ပါ။
နောက်ထက် စိတ်ထဲကနေ တစ်၊နှစ်၊သုံး၊လေး ရေရွတ်ပြီး အသက်အောင့်ထားပါ။
နောက်ဆုံးအနေနဲ့ တစ်၊နှစ်၊သုံး၊လေး ရေတွက်ရင်း အသက်ရှူထုတ်ပါ။
ရှူထုတ်ပြီး အသက်ပြန်အောင့်၊ နောက်ထပ်ရှုသွင်း၊ ပြန်အောင့်၊ ရှူထုတ်၊ပြန်အောင့် တဲ့နည်းကို ကိုယ့်စိတ်အေးချမ်းသွားတဲ့အထိလုပ်ပေးပါ။
(၂) 4-7-8 Breathing
စိတ်ထဲကနေ တစ်၊နှစ်၊သုံး၊လေး ရေတွက်ရင်း အသက်ရှူသွင်းပါ။
တစ်၊ နှစ်၊ သုံး၊ လေး၊ ငါး၊ ခြောက်၊ ခုနစ်အထိရေတွက်ရင်း အသက်အောင့်ထားပါ။
ရှူထုတ်တာကိုတော့ တစ်ကနေ ရှစ်အထိ စိတ်ထဲကနေရေတွက်ရင်း လုပ်ပေးပါ။
ဒီနည်းလမ်းကိုလည်း ကိုယ့်စိတ်ကြိုက်အကြိမ်ရေလုပ်နိုင်ပါတယ်။
(၃) စိတ်ဖိစီးမှုကိုအထူးလျော့ကျစေတဲ့ Breathing
ခန္ဓာကိုယ်ကို မတ်မတ်ရပ်ပြီးဖြစ်စေ၊ ကုလားထိုင်ပေါ် ခပ်မတ်မတ်ထိုင်ပြီးဖြစ်စေ၊ လှဲလျောင်းပြီးဖြစ်စေ နေလိုက်ပါ။
လက်နှစ်ဖက်ကို ဘေးမှာ ချထားပါ။ ဒါမှမဟုတ်၊ ပေါင်ပေါ်တင်ထားလိုက်ပါ။
လေကို နှာဖျားကနေ ခပ်ပြင်းပြင်းရှူလိုက်ပြီး ဝမ်းဗိုက်လေးဖောင်းလာတာကို သတိပြုလိုက်ပါ။
ရှူထုတ်တာကိုတော့ ပါးစပ်ကနေ ရှုထုတ်ပြီး ဝမ်းဗိုက်လေး ပြန်လျော့သွားတာကို သတိပြုလိုက်ပါ။
ထပ်တလဲလဲ တစ်မိနစ်ကနေ ငါးမိနစ်လောက်အထိလုပ်ပေးပါ။
(၄) Yogic Deep Breathing
လက်ဖဝါးနှစ်ဖက်ကို ဝမ်းဗိုက်ပေါ်တင်ထားရင်း အသက်ရှူသွင်း၊ရှူထုတ်လုပ်ပါ။ ဝမ်းဗိုက်ရဲ့လှုပ်ရှားမှုကို သတိပြုထားပါ။
လက်နှစ်ဖက်ကို နံရိုးနှစ်ဖက်ပေါ်တင်ရင်း ရှုသွင်း၊ ရှူထုတ်လုပ်ပေးပါ။ နံရိုးရဲ့လှုပ်ရှားမှုကို သတိပြုပါ။
အဆင့်သုံးကတော့ ဘယ်ဘက်လက်ကို ရင်ဘတ်ပေါ်တင်လိုက်ပါ။ ရှုသွင်းရှူထုတ်ရင်း ရင်ဘတ်လှုပ်ရှားမှုကို သတိပြုပါ။
နောက်ဆုံးအနေနဲ့ လေက ရင်ဘတ်ဆီရောက်သွားတယ်လို့ ခံစားရင်း ရှူသွင်းပါ။ ရင်ဘတ်ကနေ နံရိုးတွေဆီရောက်သွားတာကို ဆက်ခံစားပါ။ ဝမ်းဗိုက်ထဲထိ လေတွေရောက်သွားပြီလို့ ခံစားရင်း ရှူသွင်းတာကို ရပ်လိုက်ပါ။ ဖြည်းဖြည်းချင်း ရှူထုတ်ပါ။
အခုပြောပြထားတဲ့ အသက်ရှူလေ့ကျင့်ခန်းတွေကို နေ့စဉ် အချိန်တစ်ခုသတ်မှတ်ပြီး လုပ်ပေးနိုင်သလို စိတ်ခံစားချက်ပြင်းထန်လာတိုင်းမှာလည်း လုပ်ပေးနိုင်ပါတယ်။
မွန်းကျပ်လာတဲ့ စိတ်ခံစားချက်တွေကို ကိုယ်တိုင်ထိန်းချုပ်ဖို့ကြိုးစားပေမဲ့ မတတ်နိုင်တော့တာ၊ စိတ်သောကမကြာခဏရောက်တာတွေ ကြုံတွေ့ရင်ဆိုင်လာခဲ့ရရင် ရင်ဖွင့်ပြောပြနိုင်ဖို့ Call Me Today ကို ဒီ လင့်ကတဆင့် အချိန်မရွေးဆက်သွယ်နိုင်ပါတယ်နော်။
☎️: 09-5131873
Comments