အသက်ရှုလေ့ကျင့်ခန်းလုပ်ခြင်းအားဖြင့် စိတ်ပူပန်မှုတွေကို လျှော့ချနိုင်ဖို့ 

စိတ်ပူပန်မှုကို ခံစားရချိန်မှာ အများစုက အသက်ရှုမြန်တာတွေ ဖြစ်လေ့ရှိပြီး ခန္ဓာကိုယ်တွင်း ဇီဝဖြစ်စဥ်ပေါ်မှာ သက်ရောက်မှု တချို့ရှိတာကြောင့် ကြောက်ရွံ့ခြင်းနဲ့ စိတ်ဖိစီးမှုတွေကို ပိုဆိုးစေနိုင်ပါတယ်။ ဒါကို ထိန်းချုပ်နိုင်မယ့် နည်းလမ်းတခုကတော့ အသက်ရှုလေ့ကျင့်ခန်း ပြုလုပ်ခြင်းဖြစ်ပါတယ်။ အသက်ရှုလေ့ကျင့်ခန်း ပြုလုပ်တဲ့အခါမှာ စိတ်ကို လျှော့ချလိုက်ပြီး နက်နက်ရှိုင်းရှိုင်းနဲ့ ဖြေးဖြေးမှန်မှန် ရှုထုတ်ခြင်း ဖြစ်တာကြောင့် စိတ်နဲ့ ခန္ဓာကိုယ်ကို ငြိမ်သက်စေပြီး စိုးရိမ်မှုတွေကို သက်သာစေတာ ဖြစ်ပါတယ်။ အသက်ရှုလေ့ကျင့်ခန်းက စိတ်ပူပန်မှု ပြဿနာ ကို သက်သာဖို့အတွက် ဘယ်လိုကူညီပေးနိုင်တာလဲ ဆိုတာကို မျှဝေပေးချင်ပါတယ်။ 

(၁) ဦးနှောက်ရဲ့ အာရုံကြောစနစ်တချို့ကို လှုံ့ဆော်ပေးနိုင်တယ် 

စိတ်ပူပန်မှုကို ခံစားရချိန်မှာ ဦးနှောက်ရဲ့ sympathetic nervous system ကို သက်ရောက်မှု ရှိတာကြောင့် ခန္ဓာကိုယ်မှာ Fight or Flight ဆိုတဲ့ အနေအထားတခုမှာ ရှိနေပြီး စိတ်လှုပ်ရှားမှုတွေနဲ့အတူ နှလုံးခုန်မြန်ခြင်း၊ ချွေးစေးပြန်ခြင်း စတဲ့ လက္ခဏာတွေကို ကြုံတွေ့ရနိုင်ပါတယ်။ အသက်ရှုလေ့ကျင့်ခန်း ပြုလုပ်ခြင်းအားဖြင့် ဆန့်ကျင်ဘက်ဖြစ်တဲ့ parasympathetic nervous system ကို လှုံ့ဆော်ပေးပြီး နောက်ဆက်တွဲအနေနဲ့ စိတ်ကို ငြိမ်သက်စေနိုင်ပါတယ်။

(၂) အသက်ရှုနှုန်းကို ပုံမှန်ဖြစ်အောင် ထိန်းညှိပေးတယ် 

စိတ်ပူပန်မှုတွေဟာ အသက်ရှုတာကို ပုံမမှန်ဖြစ်စေသလို အထူးသဖြင့် အသက်ရှုမြန်တာနဲ့ အသက်ရှုမဝတာတွေကို ဖြစ်စေနိုင်ပါတယ်။ ဒီလိုနဲ့ပဲ နောက်ဆက်တွဲအနေနဲ့ စိတ်ပူပန်မှု ပြန်ဖြစ်စေပြီး သံသရာလည်နေတတ်ပါတယ်။ အသက်ရှုလေ့ကျင့်ခန်း ပုံမှန် ပြုလုပ်ခြင်းအားဖြင့် အသက်ရှုနှုန်းကို ပုံမှန်အနေအထား ဖြစ်စေပြီး စိတ်ကို တည်ငြိမ်စေတဲ့အပြင် စိတ်ပူပန်မှုနဲ့ နောက်ဆက်တွဲ စိတ်ဖိစီးမှု ပြဿနာတွေကို သိသိသာသာ ထိန်းချုပ်ပေးနိုင်ပါတယ်။ 

(၃) ဦးနှောက်ကို အောက်စီဂျင် စီးဆင်းမှု အားကောင်းစေတယ် 

အသက်ကို ဖြေးဖြေးမှန်မှန်နဲ့ နက်နက်ရှိုင်းရှိုင်း ရှုခြင်းအားဖြင့် ဦးနှောက်အတွင်း အောက်စီဂျင်စီးဆင်းမှုကို ပိုကောင်းစေတာကြောင့် သွေးလည်ပတ်မှု အားကောင်းစေပြီး အာရုံစူးစိုက်မှုအားကောင်းစေတယ်၊ ရှင်းရှင်းလင်းလင်း တွေးခေါ်နိုင်ပြီး စိတ်ပိုင်းဆိုင်ရာ ကျန်းမာရေးကိုလည်း ပိုမို ကောင်းစေပါတယ်။ အထူးသဖြင့် အသက်ရှုလေ့ကျင့်ခန်း ပုံမှန်ပြုလုပ်ခြင်းက စိတ်ပူပန်နေတဲ့ အချိန်မှာလည်း တည်တည်ငြိမ်ငြိမ် တွေးခေါ်ဖြစ်အောင် ကူညီပေးပါတယ်။ 

(၄) ကြွက်သားတင်းမာမှုတွေကို ဖြေလျော့စေတယ် 

စိတ်ပူပန်မှုကို ခံစားရချိန်မှာ ဇီဝပိုင်းဆိုင်ရာမှာ ကြွက်သားတွေရဲ့ တင်းကြပ်မှုကို ခံစားရနိုင်တာကြောင့် လည်ပင်း၊ ပုခုံးနဲ့ ရင်ဘက်မှာ ရှိတဲ့ ကြွက်သားတွေကို တောင့်တင်းစေပါတယ်။ ရလဒ်အနေနဲ့ ဇတ်ကြောတက်တာ၊ ပုခုံးကြောတွေ တင်းတာနဲ့ တခါတရံ အသက်ရှုရခက်ခဲတာတွေကို ဖြစ်စေနိုင်ပါတယ်။ အသက်ရှုလေ့ကျင့်ခန်းကို ပုံမှန်ပြုလုပ်ခြင်းက ခန္ဓာကိုယ်ရှိ ကြွက်သားတွေကို ဖြေလျော့စေနိုင်တာကြောင့် စိတ်ရော ခန္ဓာကိုယ်ကိုပါ အနားရစေနိုင်ပြီး တည်ငြိမ်မှုဖြစ်စေနိုင်ပါတယ်။ 

(၅) လက်ရှိအနေအထားကို ပြန်တည့်မတ်ပေးနိုင်တယ် 

ပုံမှန် အသက်ရှုလေ့ကျင့်ခန်း ပြုလုပ်ခြင်းအားဖြင့် စိတ်ပူပန်မှုတွေကို လျှော့ချပေးနိုင်ပြီး  ကိုယ့်ရဲ့ စိတ်အာရုံကို လက်ရှိကာလကို ပြန်လည် တည့်မတ် ပေးနိုင်ပါတယ်။ စိတ်ပူပန်မှုတွေ ကြောင့် စိတ်ခံစားချက်တွေကို ထိန်းချုပ်မှုခက်တာ၊ အမှားအမှန် ဝေခွဲရခက်တာတွေကို အသက်ပုံမှန်ရှုခြင်းအားဖြင့် လျှော့ချပေးနိုင်မှာ ဖြစ်ပါတယ်။ အသက်ရှုလေ့ကျင့်ခန်း ပြုလုပ်ခြင်းဟာ Mindfulness ကို လေ့ကျင့်ပြီးသားဖြစ်တာကြောင့် ကိုယ့်ကိုကိုယ် သိမြင်ခြင်း Self awareness ကို ပိုမို အားကောင်းစေနိုင်ပါတယ်။ စိတ်ပူပန်မှုကြောင့် သောကရောက်နေမယ့်အစား စိတ်ပူပန်မှုဖြစ်စေမယ့် အကြောင်းရင်းတွေကို ရှာဖွေပြီး လက်တွေ့ကျကျ ဖြေရှင်းဖြစ်စေဖို့ကို ဒီနည်းလမ်းက များစွာ ကူညီနိုင်မှာ ဖြစ်ပါတယ်။ 

အသက်ရှုလေ့ကျင့်ခန်းကို စိတ်ပူပန်ခြင်း ဖြစ်တဲ့အချိန်မှာ လုပ်ပေးနိုင်သလို ပုံမှန်အားဖြင့် နေ့စဥ် လေ့ကျင့်ပေးမယ်ဆိုရင်တော့ စိတ်ကျန်းမာရေးကို အထောက်အကူပြုစေနိုင်ပြီး စိတ်ပူပန်ခြင်းကြောင့် ဖြစ်လာတဲ့ နောက်ဆက်တွဲ စိတ်ခံစားချက်တွေကို လျော့ပါးသက်သာစေပါတယ်။ ဒါဟာ လွယ်ကူပေမယ့် ထိရောက်တဲ့ နည်းလမ်းဖြစ်သလို စိတ်ပူပန်မှုတွေကို လျှော့ချတဲ့အခါမှာ နှစ်ပေါင်းများစွာ အသုံးဝင်နေဆဲ ဖြစ်ပါတယ်။ 

သင့်အနေနဲ့ စိတ်ပူပန်မှုဆိုင်ရာ စိတ်ပိုင်းဆိုင်ရာ ပြဿနာတွေခံစားနေရတယ်ဆိုရင် Call Me Today မှတဆင့် ကျွမ်းကျင် ပညာရှင်တွေနှင့် တွေ့ဆုံကာ အခုပဲ နှစ်သိမ့်ဆွေးနွေးနိုင်ပါပြီ။ Booking ပြုလုပ်ရန်အတွက် ဒီနေရာကို နှိပ်ပါ။